હાઈલાઈટ્સ:
- અમેરિકાએ તાર વગર એક કિમીથી વધારે અંતર સુધી 1.6 કિલોવોટ વીજળીની સપ્લાય કરી
- 1890ના દાયકામાં સૌથી પહેલાં ટેસ્લાએ તાર વગર પાવર સપ્લાયનો વિચાર કર્યો હતો
- અનેક દેશો તાર વગર વીજળી પહોંચાડવાના પ્રોજેક્ટ્સ પર કામ કરી રહ્યા છે, પણ કોઈને સફળતા મળી નથી
Electricity Without Wire: હવે વીજળી સપ્લાય કરવા માટે ઓવરહેડ કે અંડરગ્રાઉન્ડ વાયરની જરૂર પડશે નહીં કેમ કે, અમેરિકાએ તાર વગર જ વીજળી સપ્લાય કરવાની કારગર તકનીક શોધી કાઢી છે. આ ટેક્નોલોજીનું સફળતાપુવર્ક પરીક્ષણ કરતાં અમેરિકાએ એક કિમીથી વધારે અંતર સુધી 1.6 કિલોવોટ વીજળીની સપ્લાય કરી છે. આમ તો, તાર વગર વીજળી સપ્લાય કરવાનો આઈડિયા 100 વર્ષ જૂનો છે. દુનિયાભરના અનેક દેશોમાં તાર વગર વીજળી પહોંચાડવાના અનેક પ્રોજેક્ટ્સ ચાલી રહ્યા છે, પણ અત્યાર સુધી કોઈપણ દેશને તેમાં સંપુર્ણ સફળતા મળી શકી નથી.
યુએસ નેવલ રિસર્ચ લેબોરેટરીએ મેરીલેન્ડમાં યુએસ આર્મી રિસર્ચ ફિલ્ડમાં માઈક્રોવેવ બીમનો ઉપયોગ કરીને એક કિમી (3280 ફૂટ)થી વધારે અંતર સુધી 1.6 કિલોવોટ વીજળી પહોંચાડી છે. આ પ્રોજેક્ટમાં સામેલ વૈજ્ઞાનિકે જણાવ્યું કે, આ ટેક્નોલોજીનો સિદ્ધાંત ખુબ જ સરળ છે. વીજળીને માઈક્રોવેવમાં ટ્રાન્સફર કરવામાં આવે છે, જેને રેક્ટેના એલિમેન્ટથી બનેલાં રિસીવર પર એક બીમમાં કેન્દ્રિત કરવામાં આવે છે. આ ખુબ જ સરળ ઘટક છે, જેમાં એક આરએફ ડાયોડની સાથે એક એક્સ-બેંડ ડાઈપોલ એન્ટિના હોય છે. જ્યારે માઈક્રોવેવ રેક્ટેના સાથે ટકરાય છે, તો એલિમેન્ટ કરન્ટ ઉત્પન્ન કરે છે.
એડવાન્સ કોન્સેપ્ટ ગ્રૃપના પ્રમુખ ક્રિસ્ટોફર રોડેનબેકના નેતૃત્વમાં એનઆરએલ ટીમને રક્ષા વિભાગે એક સેફ એન્ડ કન્ટિન્યુઅસ પાવર બીમિંગ-માઈક્રોવેવ પ્રોજેક્ટને વિકસિત કરવાનું કામ સોંપ્યું હતું. તેનું મિશન આ પ્રકારની ટેક્નોલોજીની શોધ કરવા માટેનું હતું. તેઓએ કહ્યું કે, પ્રારંભિક શંકાઓ છતાં પણ માઈક્રોવેવ બીમિંગ આશ્ચર્યજનક રીતે સફળ સાબિત થઈ છે. તેવામાં આ ટેકનિક પર આગળ પણ કામ કરવામાં આવશે.
1890ના દાયકામાં સૌથી પહેલાં ટેસ્લાએ તાર વગર પાવર સપ્લાયનો વિચાર કર્યો હતો. આ માટે તેઓએ ટેસ્લા કોઈલ નામની એક ટ્રાન્સફોર્મર સર્કિટ પર કામ કર્યું હતું, જે વીજળી ઉત્પન્ન કરતું હતું, પણ તે એ સાબિત ન કરી શક્યા કે, તે લાંબા અંતર પર વીજળીને એક બીમને નિયંત્રિત કરી શકે છે. ત્યારથી દુનિયાભરના વૈજ્ઞાનિક આજ સુધી તાર વગર વીદળી સપ્લાય કરવાની ટેકનિક શોધી રહ્યા છે.